2026 жылдың 25 мамыры-6 маусымы аралығында Орталық мемлекеттік ғылыми-техникалық құжаттама архивінде әл-Фараби атындағы Қазақ ұлттық университетінің 6В03204-Архивтану, құжаттану және құжаттамалық қамтамасыз ету мамандығы бойынша 1 курс студенттері өндірістік тәжірибеден өтті.
Архив бүгінде республикадағы ХІХ ғасырдың соңынан бүгінгі күнге дейінгі Қазақстанның ғылымы мен техникасының қалыптасуы және дамуы тарихы бойынша құжаттарды сақтайтын аса ірі бейінді мекеме болғандықтан негізгі қызметі ғылыми-зерттеу, конструкторлық, технологиялық институттардың, конструкторлық бюролардың қызметінде, сондай-ақ күрделі құрылыс саласында қалыптасқан ғылыми-техникалық құжаттаманың құрамы мен мазмұнын зерттеу бағытында қызмет атқарады.
ОМҒТҚА қызметкерлері болашақ әріптестеріне архивтердің көзге көрінбейтін, алайда өте маңызды қызметінің ерекшеліктері жайлы, бұл киелі шаңырақтың тарихи-мәдени мұраны көздің қарашығындай сақтау және насихаттаудағы рөлі маңызды екенін түсіндірді. Студенттерге архивтік құжаттарды цифрландыру үдерісін көрсетіп, құжаттардың сақталуын қамтамасыз ету, оларды ғылыми мақсаттарда пайдалану жөніндегі жұмыстармен таныстырды. Архив ғимаратында экскурсия ұйымдастырып, архив саласы жұмысының ерекшеліктері, бірегей құжаттар туралы ақпаратпен бөлісті.