2026 жылғы 27 тамызда Орталық мемлекеттік ғылыми-техникалық құжаттама архивінде Семей ядролық сынақ полигонының жабылғанына 35 жыл толуына орай «Полигон – 29 тамыз» халықаралық қайырымдылық қоғамдық қорының негізін қалаушы, қоғам қайраткері Нұрлан Кешірімұлы Бозтаевпен кездесу форматында дөңгелек үстел өтті. Іс-шараның мақсаты – Семей ядролық сынақ полигонының жабылуының тарихи маңызын насихаттау, Қазақстанның ядролық қарусыздану және ядролық қаруды таратпау саласындағы бастамаларының халықаралық маңызын көрсету, сондай-ақ жас ұрпақ арасында бейбітшілік, қауіпсіздік және ядролық қатерден азат әлем құндылықтарын дәріптеу. Дөңгелек үстелді архив директоры Баян Амантайқызы Жұматаева кіріспе сөзімен ашып, Семей ядролық сынақ полигонының жабылуы Қазақстан тарихындағы маңызды оқиғалардың бірі екенін атап өтті. Сондай-ақ архивтік құжаттардың тарихи кезеңді зерттеудегі және кейінгі ұрпаққа жеткізудегі рөліне тоқталды. Іс-шара барысында Семей ядролық сынақ полигонының тарихы, ядролық сынақтардың зардаптары, полигонның жабылуының тарихи маңызы, архивтік құжаттардың ғылыми құндылығы, ядролық қарусыздану және ядролық қаруды таратпау мәселелері талқыланды. Ақпарат және құжаттарды пайдалану бөлімінің қызметкері Сырым Саблин «Документы об изучении последствий испытаний ядерного оружия на Семипалатинском полигоне (по материалам фондов личного происхождения ЦГА НТД)» тақырыбында баяндама жасап, архив қорларында сақталған Семей полигонындағы ядролық сынақтардың зардаптарын зерттеуге қатысты құжаттармен таныстырды. Кездесу барысында Нұрлан Кешірімұлы Бозтаев Семей полигонының жабылуының халықаралық маңызы, ядролық қарусыздану идеясын насихаттау және бейбітшілік пен қауіпсіздікті қамтамасыз ету бағытындағы жұмыстар туралы ой бөлісті. Дөңгелек үстелге архив саласының мамандары, тарихшылар, қоғам қайраткерлері, Нұрлан Кешірімұлы Бозтаев және «Полигон – 29 тамыз» халықаралық қайырымдылық қоғамдық қорының өкілдері қатысты.