2014 жылдың 10 қазанында Орталық мемлекеттік ғылыми-техникалық құжаттама мұрағатында Қазақ мемлекеттік қыздар педагогикалық университеті студенттерінің кәсіби тәжірибесі аяқталды.
Ағымдағы жылдың 24 шілдесінде мұрағат пен университет арасында студенттердің жұмысы бойынша келісім-шарт жасалды. Осы құжат негізінде мұрағатта 2 қыркүйектен бастап әлеуметтік-гуманитарлық факультетінің 4 курс 5В020300 тарих мамандығы бойынша 9 студенті кәсіби тәжірибеден өтті.
Мұрағат басшылары студенттерге мұрағат саласымен танысу мақсатында Орталық мемлекеттік ғылыми-техникалық құжаттама мұрағатының тарихы, бөлімдердің қызметі, мұрағат құжаттарын сақтау ережелері туралы әнгімелесу және тақырыптық экскурсия жүргізді.
Тәжірибе өту барысында студенттер үш топқа бөлінді. Мұрағаттың үш бөлімінде: ақпарат және құжаттарды пайдалану, Ұлттық мұрағат қорын толықтыру және ведомствалық мұрағат қоры, құжаттарды сақтау, есепке алу және ғылыми аппаратын жасау, екі аптадан кезек-кезек ауысып жүріп мұрағат ісінің негізгі бағыттарымен танысты.
Тәжірибе кезінде студенттер мобильдік стеллажды қолдануды үйренді, қоймадағы құжаттардың орнын ауыстырумен, картондаумен, зерттеушілерге істерді берумен айналысты, ғылыми-техникалық құжаттаманың электрондық каталогымен, толықтыру көздерімен, ғылыми-зерттеу құжаттарының тізімін жасау жұмыстарымен таныстырылды, жеке құрам бойынша тізімдемелердің электрондық нұсқасын жасады, құжаттарды тігуді меңгерді.
Студенттер өзін жақсы қырынан көрсете білді, мұрағат ұжымымен тез арада тіл табысты. Берілген тапсырмаларды уақтылы және сапалы орындауға тырысты, тиянақтылығын көрсетті.
Келешекте Орталық мемлекеттік ғылыми-техникалық құжаттама мұрағаты жоғары оқу орындарын бітіретін жастарға арналған кәсіби бағдарлау жұмысын жалғастыруда.