2015 ж. 24 сәуірінде Орталық мемлекеттік ғылыми-техникалық құжаттама мұрағатының қызметкерлері ҚР «Ғылым ордасы» Қазақстан ғылымының тарихы және Оңтүстік Қазақстан облысының Н.Оңдасынов атындағы мұражайлары бірлесіп Ұлы Жеңістің 70 жылдығына арнайы ұйымдастырылған көрмесіне қатысты.
Көрмені «Ғылым ордасы» РМК-нің бас директоры Р. Кәрібжанова ашты. Келесі кезекте сөз Түркістан қаласында орналасқан Н.Оңдасынов мұражайының қызметкері Г.Ысқақова, Ш.Ш.Уәлиханов атындағы Тарих және этнология институтының ғылыми қызметкері, тарих ғылымдарының кандидаты С.Ә.Асанова, ҚР Жазушылар одағының мүшесі, ақын, прозаик Р.Артемьеваға берілді.
Жиылған қонақтарға ерекше әсер қалдырған Абай атындағы опера және балет театрының майталман әртістері: ҚР еңбегі сіңірген мәдениет қайраткері Б.Жомартов, Халықаралық және ҚР конкурстардың лауреаттары Ж.Аманова, М.Алтухованың өнерлері болды.
Көрмеге Ұлы Отан соғысының Жеңісіне үлес қосқан, аты аңызға айналған тұлғалар: Қазақстан Халық Комиссарлар Кеңесінің төрағасы болған, қоғам қайраткері, тілші-ғалым Нұртас Оңдасыновтың, аса көрнекті қазақ геологы, қоғам қайраткері, Қазақ КСР Ғылым академиясын ұйымдастырушы және оның тұңғыш президенті Қаныш Сәтбаевтың, майдан даласынан елге оралып, Қазақстан ғылымының түрлі саласында үлкен жетістіктерге жеткен соғыс ардагерлері – Әбдіуәли Қайдар, Жүрімбек Сыдықов, Түймебай Әшімбаев, Айтжан Абдулин, Евгений Гвоздев, Павел Мариковский және өзге де ғалымдардың жеке заттары, фотолары, қолжазбалары, ғылыми еңбектері қойылды.