2015 ж. 11 мамыр күні «ТАҢ» телеарнасынан «Хранители будущего» деректі фильмдерінің циклынан «Шәкен Мәжитов. Қазақстанның тұңғыш ғалым - криминологі» (режиссері – Д. Сәлімбаев) фильмі көрсетілді. Фильмді дайындау барысында авторлар Орталық ғылыми-техникалық құжаттама мұрағатының сақтауындағы Ш. Мәжитовтың және Б.А. Ермекованың (жұбайы) жанұя қоры құжаттарын кеңінен пайдаланды. Осының арқасында көпшілік көрермендер алғашқы рет Ш. Мәжитовтың өмірбаянындағы қызықты фактілермен, сонымен қатар 1941-1945 жж. Ұлы Отан соғысы жылдарындағы кезеңмен, оның ғылыми және басқа да еңбектерімен кеңінен таныса алды.
Сонымен қатар, оның жұбайы ғалым-химик, техника ғылымдарының кандидаты, дарынды ұстаз Б.А. Ермекованың жеке құжаттары да көрсетілді.
Мұрағат директоры Г.С. Сәрсенова көрсетілген кейбір құжаттарға түсініктеме беріп, сондай-ақ, фильмді құрастырушыларды мұрағаттағы бірегей құжаттардың сақтау талаптарымен таныстырып кетті.
Ш. Мәжитовтың туыстары және әріптестері өз естеліктерімен бөлісті. Театрдың актерлері Ш. Мәжитовтың өмірінің кейбір эпизодтарын реконструкциялап, сахнада ойнап шықты.