Сенаттың Әлеуметтік-мәдени даму және ғылым комитетінің мүшелері еліміздің Мәдениет және спорт министрімен кездесті. Мемлекет басшысының "Жаңа жағдайдағы Қазақстан: іс-қимыл кезеңі" атты Жолдауын іске асыру аясында архивтер мен кітапхана қорының жай-күйін жақсартуды, қолжазбаларды, сирек кездесетін кітаптар мен құнды құжаттарды цифрландыруды басты назарға алған кездесуді сенатор, комитет төрағасы Мұрат Бақтиярұлы жүргізді.

Мәдениет және спорт министрі Ақтоты Райымқұлова депутаттардың сауалдарына жауап бере келіп, еліміздің кітап қоры мен кітап қоймаларының жай-күйі, сондай-ақ кітапханашылар мен архив қызметкерлерінің жалақысы туралы егжей-тегжейлі баяндады.

Өз кезегінде сенатор Нұртөре Жүсіп елімізде архивтерді дамытуға көбірек көңіл бөлініп, олардың жағдайы қазіргі заманғы стандарттарға сәйкес келуі керектігін атап өтті. Жиынға қатысушылар тарихи маңызды қолжазбалардың, сирек басылымдар мен кітаптардың көшірмелерін іздеу мен сатып алуды қаржыландырудың маңыздылығы туралы айтты. Кездесу соңында сенаторлар мәдениет қызметкерлерінің жалақысын көтеру мәселесін қарастыруды және сирек кітаптар мен қолжазбалар сақталатын Ұлттық орталық құруды ұсынды.

Кездесуге онлайн түрде ҚР «Орталық мемлекеттік архив» РММ директорының орынбасары Мәрзия Жылысбаева, «Орталық мемлекеттік ғылыми-техникалық құжаттама архив» РММ директоры Баян Жұматаева, «Орталық мемлекеттік кино-фотоқұжаттар мен дыбыс жазбалары архиві» РММ директоры Жанай Омаров та қатысып, «Архив - 2025» мемлекеттік бағдарламасына қатысты өз ойларын ортаға салды.