2021 жылдың 26 тамызында ҚР Мәдениет және спорт министрлігінің «Орталық мемлекеттік ғылыми-техникалық құжаттама архиві» РММ қызметкерлері өте маңызды тарихи құжатқа - Қазақ КСР Президентінің 1991 жылғы 29 тамыздағы № 409 «Семей ядролық полигонын жабу туралы» Жарлығына қол қойылғанына 30 жыл толуына арналған «Қазақстанның әлемдік экологияға қосқан тарихи үлесі» атты Дөңгелек үстелге онлайн түрде қатысты.
Іс-шараны Қазақстан Республикасы Президентінің архиві ұйымдастырды, онда осы құжаттың түпнұсқасы, сондай-ақ, осы мәселенің тарихын ашатын басқа да көптеген құжаттар сақталады.
Дөңгелек үстел отырысын ҚР Президенті архивінің директоры Д. Абдукадырова ашып, әрі қарай модераторы - ҚР Президенті архиві директорының орынбасары Қ. Әлімғазинов жүргізді.
Содан кейін, республиканың ғылыми орталықтарының басшылары, ғалымдар, тарихшылар, архивистер, қоғам қайраткерлері полигонның ашылу тарихы, ядролық қару сынақтары, олардың салдары мен зардап шеккендерді оңалтуы, «Невада-Семей» қоғамдық антиядролық қозғалысының пайда болуы және оның Семей полигонын жабудағы рөлі туралы баяндамалар мен хабарламалар жасады. Баяндамашылар арасында ОМҒТҚА директоры Б. Жұматаева болды.
Дөңгелек үстел қатысушыларына Қазақстан Республикасы Президентінің және Қазақстан Республикасының басқа да архивтерінен осы тақырып бойынша деректі виртуалды көрме ұсынылды.