2021 ж. 20 желтоқсанда кәсіби мереке – Қазақстан Республикасының Архивистер күні қарсаңында ҚР Президенті Архивінде ОМҒТҚА мен ҚР ПА архивистерінің кездесуі өтті.
Іс-шара алдында ҚР ПА қызметкерлері өз әріптестерін Қазақстан Республикасы Тәуелсіздігінің 30 жылдығына орай дайындаған құжаттық көрме экспозициясымен таныстырды.
Одан кейін ҚР ПА Үлкен залында архивистердің кездесуі өтіп, оның барысында архивтердің кәсіби қызметінің кең ауқымды мәселелері талқыланды. Іс-шара аясында екі архив қызметкерлері дайындаған жаңа басылымдарын ұсынып ОМҒТҚА архивистері «Қазақстан архивтері» анықтамасымен, ҚР ПА қызметкерлері ҚР Президенті Архивінің қорлары бойынша жасалған жолсілтерімен таныстырып өтті. Екі басылым да осы жылы жарық көрді.
Іс-шараға белгілі ғалым, «Арыс» қоғамдық қорының төрағасы, филология ғылымдарының докторы, саяси қуғын-сүргін құрбандарын толық ақтау жөніндегі ҚР Мемлекеттік комиссиясының мүшесі Г.К. Анес қатысты. Өз сөзінде ол осы комиссия мүшелері атқарған және әлі де орындалуы тиіс жұмыстар туралы айтып берді.
Кездесуді қорытындылай келе, екі архив басшылары Д.Ю. Әбдіқадырова мен Б. А. Жұматаева осындай кәсіби кездесулердің пайдалы екенін және жиі өткізу қажеттігін атап өтті.