2022 жылдың 15 маусымында Қазақстан Республикасы Президентінің Архиві, әл-Фараби атындағы Қазақ Ұлттық университеті және Ресей мемлекеттік гуманитарлық университеті бірлесе ұйымдастырған архив мамандарына арналған Жазғы мектеп өз жұмысын бастады.
Бесінші рет өткізіліп жатқан Жазғы мектепке Қазақстан, Әзербайжан, Армения, Беларусь, Қырғызстан, Ресей, Өзбекстан, Қытай мен Моңғолиядан 380-ге жуық архив маманы қатысып жатыр. Аталған шара жас архившілердің біліктілігін арттыруға, жаңа технологиялар мен архив жұмысындағы заманауи әдістермен танысуға, архив саласындағы халықаралық қатынастарды дамытуға бағытталған.
Архив мамандарына арналған жазғы мектептің алғашқы күні және ашылу салтанаты Қазақстан Республикасы Президентінің Архивінде өтті. Жазғы мектептің ашылу салтанатына Қазақстан Республикасы Орталық мемлекеттік ғылыми-техникалық құжаттама архивінің директоры Б.А. Жұматаева қатысты. Жазғы мектеп жұмысына ОМҒТҚА қызметкерлері: Копешов Азат, Омарбеков Абайбол, Қайырбек Аружан, Молдағали Әлихан, Нұрбеков Нұржан, Әділбек Исламбек қатысады.
Жазғы мектептің алғашқы күні архив ісі саласын ғылыми зерттеп жүрген ғалымдар баяндама жасады.
Алдағы екі күнде Оңтүстік Корея, Қытай, Беларусь, Монғолияның ғалымдары да баяндама жасайды. Биылғы жазғы мектеп онлайн, офлайн форматта өтеді. Жазғы мектеп маусым айының 17-не дейін жалғасады.