Орталық мемлекеттік ғылыми-техникалық құжаттама архивінің қызметкерлері А. Байсарина және А. Нұржігітова Р.Б. Сүлейменов атындағы Шығыстану институты мен Қазақстан Республикасының Мемлекеттік орталық музейі бірлесіп ұйымдастырған «Шетелдік архивтік қорларындағы Еуразия тарихы» атты көрменің салтанатты ашылуына қатысты. Көрме «Қазақстан және Орталық Азияның тарихи-мәдени мұрасы шетелдің архивтік қорларының жинақтарында» ғылыми жобасының шеңберінде өткізілді.
Көрмеде ежелгі дәуірден бастап бүгінгі күнге дейінгі қазақ мемлекеттілігінің объективті тарихын қалпына келтіру мақсатында, шетелдің архивтері мен қорларынан алынған тарихи жәдігерлердің бірегей көшірмелері ұсынылған. Көрме қатысушылары Монғолияның тарихи музейінде сақталған б.з.д III ғасырдағы ғұн тәңірқұтының алтын тәжі, Қ.А. Йассауи кесенесіне арнап жасалған Әмір Темірдің есімі бар майшамның фотосуреті және өзге де қолжазбалардың фотосуреттері мен көшірмелерін үлкен таңданыспен тамашалады.