2025 жылдың 4 наурызында Орталық мемлекеттік ғылыми-техникалық құжаттама архивінде 1941-1945 жылдардағы Ұлы Отан соғысына қатысушы, медицина ғылымдарының докторы Халида Маманованың жеке тектік қорындағы құжаттар негізінде дайындалған «Маманова Халида: архивтік құжаттардағы дәуір мен тұлға» атты құжаттық көрме өтті. Халида Маманова – қазақ қыздары арасынан шыққан тұңғыш ғылым докторы және айыпталушылар батальонында соғысып, Берлинге дейін жеткен жалғыз қазақ әйел.
Х.Маманованың құжаттарын ОМҒТҚА тұрақты мемлекеттік сақтауға оның туыстары өткізген. Оның ішінде жеке текті құжаттар бар: Қазақ мемлекеттік медицина институтының студенті Халида Маманованың жеке ісі, 1937 жылы өз қолымен жазылған өмірбаяны, медицина ғылымдарының кандидаты мен докторы ғылыми атақтары берілген дипломдары, Х. Маманованың «Қатерлі ісіктің патогенезі туралы» 1962 жылы Алматыда өткен онкологтардың VI Республикалық конференциясында оқыған баяндама тезистері, әріптестері мен туыстарының естеліктері. Сондай-ақ оның әкесі Есенқұл Мамановты БМСБ өкілдерінің тергеу хаттамалары және басқа да көптеген құжаттар бар.
Көрменің мақсаты – саяси қуғын-сүргін мен Ұлы Отан соғысының барлық ауыртпалығын басынан өткерген қазақ халқының даңқты қызы Халида Маманованың бай құжаттық мұрасын насихаттау.
Көрмені қалалық архив мекемелерінің қызметкерлері, орта және жоғары оқу орындарының оқытушылары мен студенттері тамашалады.