2025 жылдың 14 наурызы күні Орталық мемлекеттік ғылыми-техникалық құжаттама архивінде Наурыз мейрамының алғашқы мерекесі «Көрісу күні» өтті.
Бұл күнді Амал мерекесі деп те атайды. Адамдар осы күні бұрынғы өкпе-ренішін кешіріп, бір-біріне амандық-саулық тілейді. Көрісу күнінде жасы кіші адам үлкен кісінің үйіне барып көрісіп шығады. Бұл күні халық қыстан аман-есен шыққанына, көктемге аяқ басып, туыс-туғанмен жүздескеніне қуанып, қол алысып, төс қағысады. Бір-біріне деген араздық, өкпе-ренішті ұмытып, амандық тілейді.
Барша архив қызметкерлері бір-бірімен төс қағыстырып, бір-біріне «Бір жасқа есеюіңмен! Осы жылға аман - есен жетуіңмен!» деген ақжарма тілектерін айтып, құжақ жая көрісті.
Орталық мемлекеттік ғылыми-техникалық құжаттама архивінің директоры Баян Амантайқызы осындай игі шаралар салт-дәстүрімізді дәріптеудегі келешек ұрпаққа үлгі екенін және жалпы Наурыз мерекесі - достықтың, ынтымақтың, ырыс-берекенің, жаңарудың мерекесі, халықтар бірлігі мен татулығының бастауы екенін атап өтті.