Орталық мемлекеттік ғылыми-техникалық құжаттама архивінің қызметкерлері Қазақстан Республикасының Президенті Архиві 2017 жылдан бері дәстүрлі түрде өткізіп келе жатқан жас архившілердің VIII Халықаралық Жазғы мектебінің жұмысына қатысуда. Жазғы мектептің биылғы тақырыбы «Архивтердің цифрлық трансформациялануы және құжаттық мұраны сақтау» деп аталады.Ол Мемлекет басшысы Қасым-Жомарт Тоқаевтың ұлттық цифрлық архив құрып, оны еліміздегі және шетелдердегі нейрожүйе жасаушылардың еркін пайдалануына мүмкіндік беру қажеттігі бойынша ойына байланысты.
Орталық мемлекеттік ғылыми-техникалық құжаттама архивінің директоры Жұматаева Баян Амантайқызы архив қызметкерлерінің кәсіби мерекесіне орай 9 маусым күні ҚР Президенті Архиві еліміздің орталық және өңірлік архивтерінің басшылары, сондай-ақ әкімдіктер жанындағы цифрландыру және архив басқармаларының өкілдерімен өткізген кездесуге қатысты. Қонақтарға жаңа ғимараттың көрме залы, сақтау қоймалары мен зертханаларына арнайы экскурсия ұйымдастырылды.
Кездесу барысында құжаттарды қалпына келтіру, цифрландыру және сақтау бағытындағы заманауи жабдықтардың мүмкіндіктері кеңінен көрсетілді. Қонақтар Архивтің бірыңғай ақпараттық-іздеу жүйесінің тиімділігімен танысып, оның қолданушыларға ыңғайлы функцияларына ерекше назар аударды. Сонымен қатар, архивтік деректердің ашықтығы мен қолжетімділігін арттыруға бағытталған «е-Архив» ақпараттық жүйесінің мүмкіндіктері таныстырылды.
Жиын аясында архив саласындағы өзекті мәселелер, цифрландыру процесі, жаңа технологияларды енгізу, сондай-ақ архив мекемелері арасындағы ынтымақтастық бағыттары талқыланды.