2025 жылғы 25-26 маусымда Орталық мемлекеттік ғылыми-техникалық құжаттама архивінде ҰАҚ толықтыру және ведомстволық архивтер бөлімі ведомстволық архив жұмысына жауапты ұйымдардың іс жүргізушілері мен қызметкерлері үшін «Мемлекеттік архив саясаты тұрғысынан ведомстволық архивтерді ұйымдастыру және дамыту» атты екі күндік семинар өткізді.
Семинарды Орталық мемлекеттік ғылыми-техникалық құжаттама архивінің директоры Баян Амантайқызы Жұматаева ашты.
Мұндай семинарлар архивтің толықтыру көздері болып табылатын ұйымдарда құжаттамамен жұмыс істейтін мамандардың біліктілігін арттыруға бағытталған және ведомстволық архивтерде жұмыстарды ұйымдастыру бойынша әдістемелік көмек көрсетуді мақсат етіп қояды.
Аталған семинар құжаттарды ұйымдастыруға, сақтауға, есепке алуға және пайдалануға байланысты кең ауқымды тақырыптарды қамтыды, мысалы: ұйымдардағы архив ісі мен іс жүргізуді нормативтік-құқықтық реттеу; ведомстволық архивтерде істерді қалыптастыру: істер номенклатурасынан архивтік тізімдемелерге дейін; құжаттарды дайындау және мемлекеттік архивке тапсыру; ұйымның сараптамалық комиссиясының құрамы, қалыптастыру тәртібі, негізгі функциялары; мемлекеттік және мемлекеттік емес ұйымдарда құжаттау, құжаттаманы басқару және электрондық құжат айналымы жүйелерін пайдалану қағидаларын қалыптастыру тәртібін; жобалау-сметалық құжаттаманы ғылыми ұйымдастыру және оны техникалық өңдеу; ғылыми-техникалық құжаттама; мемлекеттік және ведомстволық архивтер құжаттарының сақталуын қамтамасыз ету және т.б.
Семинардың практикалық бөлігінде архив мамандары құжаттарды сандық форматқа көшіру және құжаттарды тігу бойынша шеберлік сыныптарын өткізді. Олар осы бағыттар бойынша жұмыс үдерісін көрнекі көрсетті.
Ұйымдастырушылар қатысушылар үшін архивте тақырыптық экскурсия өткізді.
Семинардан кейін қатысушылар пікір алмасып, нәтижелерін қорытындылады.
Семинардың барлық қатысушыларына сертификаттар табыс етілді.