2025 жылғы 19 қыркүйекте Орталық мемлекеттік ғылыми-техникалық құжаттама архиві «Архив және болашық ұрпақ» тақырыбында ашық есік күнін өткізді.
Жыл сайын өткізілетін шара архивтердің маңыздылығын түсіндіру, архив қорларындағы бірегей құжаттармен танысуға мүмкіндік беруді, тарихи мұраны сақтау ісінде азаматтардың рөлін арттыруды мақсат етеді. Бұл шараның өскелең ұрпақты отаншылдыққа, ұлттық тарихқа деген құрметке тәрбиелеуде және архив ісінің құндылығын түсіндіруде маңызы зор.
Шараға ОМҒТҚА және архивтің толықтыру көздері болып табылатын ұйымдардың қызметкерлері, әл-Фараби атындағы Қазақ ұлттық университеті, Абай атындағы Қазақ ұлттық педагогикалық университеті және Қазақ ұлттық қыздар педагогикалық университетінің оқытушылары мен студенттері қатысты. Ашық есік күні аясында келушілер архив қорларындағы сирек әрі құнды құжаттармен, архив қызметінің қыр-сырымен жақынырақ танысты.
Қонақтарға республикамызда халық шаруашылығының, ғылым мен техниканың аса құнды және соңғы жетістіктерін көрсететін ғылыми-техникалық құжаттаманың орталықтандырылған есепке алынуын, сақталуын және пайдаланылуын қамтамасыз ететін бейінді архивтің қызметі, құжаттар мен қорлар мазмұны бойынша ақпарат берілді және архив ғимаратына танымдық экскурсия жүргізілді.