2019 ж. 4 қаңтарында ҚР Мәдениет және спорт министрі Арыстанбек Мұxамедиұлының бұйрығымен Алматыдағы «Орталық мемлекеттік архив» РММ директоры болып Қарымсақов Арнұр Жасабекұлы тағайындалды. Ол бұған дейін «Қазқайтажаңарту» РМК басқарған, «Дарын» сыйлығының лауреаты, PhD докторы. Архив ұжымына жаңа директорды Архив ісі және құжаттама департаментінің директоры Бағдат Таңсыбеков таныстырды.
Бұдан кейін департамент директоры Бағдат Қалтайұлы Орталық мемлекеттік кино-фотоқұжаттар мен дыбыс жазбалары архиві (бұдан әрі – ОМ КФҚДЖА) және Орталық мемлекеттік ғылыми-техникалық құжаттама архивінің (бұдан әрі – ОМҒТҚА) жұмысымен танысты. Архив мекемесін аралау барысында «Архив–2025» бағдарламасы аясында жасалатын жұмыстар талқыланып, «Электронды архив» бірыңғай ақпараттық іздеу жүйесіне қатысты ой-пікірлер ортаға салынды. «Ақпараттық технология архив ісін де айналып өткен жоқ. Қағаз түріндегі құжаттарды цифрлық нысанға көшіру жұмыстары белсенді жүргізіліп жатыр», – деді ОМҒТҚА директоры Баян Жұматаева. Өз кезегінде ОМ КФҚДЖА директоры Тасқын Тойбаев архив қызметіне байланысты ақпараттық ресурстарды қалыптастыру, пайдалану негізінде мәлімет алу қажеттілігін қанағаттандыру үшін оңтайлы жағдай жасауға барынша көңіл бөлініп жатқанын атап өтті.