2022 жылдың 17 ақпанында Қазақстан Республикасы Орталық мемлекеттік ғылыми-техникалық құжаттама архивінің қызметкерлері Қазақстан Республикасы Президентінің архиві ұйымдастырған, республикамыздың көрнекті мемлекет қайраткері Жұмабай Шаяхметовке арналған дөңгелек үстел отырысына онлайн режимде қатысты.
Жұмабай Шаяхметов – Қазақстан Компартиясы Орталық комитетінің бірінші хатшысы (1946-1954 жж.), КСРО Жоғарғы Кеңесі Ұлттар Кеңесінің төрағасы (1950–1954 жж.).
Іс-шараны Қазақстан Республикасы Президенті Архиві директорының орынбасары Қ.Ш. Әлімғазинов ашты. Дөңгелек үстелге қатысушылар алдымен күні кеше өмірден өткен, Қазақстан Республикасы Президентінің Архивін біраз жылдар (1997-2004) басқарған Людмила Давлетқызы Дегитаеваны еске алып, құрмет көрсетті.
Одан кейін Ш.Ш. Уәлиханов атындағы Тарих және этнология институтының директоры, тарих ғылымдарының докторы З.Е. Қабулдинов, ҚР Ұлттық ғылым академиясының академигі, тарих ғылымдарының докторы М.Қ. Қойгелдиев, Қазақстан Республикасы Президентінің Архиві жанындағы Қоғамдық кеңестің төрағасы, техника ғылымдарының докторы Б.А. Жапаров, М. Жүнісов (Омбы), Қазақстан Республикасы Президентінің Архивінде ұйымдастырылған Ж. Шаяхметовтың жеке текті қорына бірқатар құжаттарды тапсырған Ж. Шаяхметовтың немерелері Р.Р. Шаяхметов және А.Р. Шаяхметов, тарих ғылымдарының докторы Л.А. Ахметова, А. Раисов (Омбы), тарихшы Л.А. Гривенная (Петропавл), Нархоз университетінің профессоры. экономика ғылымдарының кандидаты Е.М. Бутин қатарлылар Ж. Шаяхметовтың өмірі мен қызметі туралы баяндамалар мен хабарламалар жасады.
Дөңгелек үстел аясында Қазақстан Республикасы Президентінің Архиві мен Ш.Ш. Уәлиханов атындағы Тарих және этнология институты дайындаған «Жұмабай Шаяхметов. Құжаттар мен материалдар жинағының» тұсаукесері өтті.