2022 жылдың 10 наурызында Қазақ онкология және радиология ғылыми-зерттеу институтында С.Асфендияров атындағы Қазақ Ұлттық медициналық университетінің онкология кафедрасына салтанатты түрде профессор Сәкен Нұғманұлы Нұғмановтың атын беру рәсімі өткізілді. Іс шараға Орталық мемлекеттік ғылыми-техникалық құжаттама архиві қызметкерлері қатысты.
Рәміздік лентаны қию рәсімі институт ардагерлеріне берілді. Одан кейін іс шара мәжіліс залында жалғасты.
Онкология кафедрасының меңгерушісі, Қазақ онкология және радиология ғылыми-зерттеу институтының басқарма төрайымы, Қазақстан Республикасы Ұлттық ғылым академиясының академигі, профессор Диляра Қайдарова С.Н. Нұғмановтың атқарған кәсіби қызметі мен оның республикадағы онкологиялық қызметтің дамуына қосқан жеке үлесі туралы айтып өтті. ҚазҰМУ ректоры Т.С. Нұрғожин ҚазҰОРҒЗИ қызметкерлерін осы айтулы күнмен құттықтап, оның басшылығына С.Асфендияров атындағы ҚазҰМУ-ің онкология кафедрасына профессор Сәкен Нұғманұлы Нұғмановтың атын тағайындау туралы скертификат табыс етті. Дәл осындай сертификат С.Н. Нұғмановтың отбасына берілді.
Институт ардагерлері С.Н. Нұғмановпен бірге істеген жұмыстары туралы естеліктерімен бөлісті. ОМҒТҚА директоры Б.А. Жұматаева өз сөзінде институт ұжымын осы айтулы күнмен құттықтай отырып, Нұғмановтар отбасына С.Н. Нұғмановтың құжаттарын мемлекеттік сақтауға уақытында Орталық мемлекеттік ғылыми-техникалық құжаттама архивіне тапсырғандары үшін алғысын білдірді. Нұғмановтың жеке қорындағы фотосуреттерін кафедраға және оның отбасына табыстады.
Сондай-ақ осы іс-шараға ОМҒТҚА қызметкерлері С.Н. Нұғмановтың жеке қорындағы құжаттары бойынша слайд-шоу дайындады. Орталық мемлекеттік кино-фотоқұжаттар мен дыбыс жазбалар архиві қорынан алынған деректі хроникаға негізделген, сондай-ақ отбасылық архивінің бейнематериалдарынан алынған С.Н. Нұғманов туралы фильм көпшіліктің назарына ұсынылды.
Салтанатты шараға ҚазҰОРҒЗИ ардагерлері, С.Асфендияров атындағы ҚазҰМУ басшылары және ҚазҰОРҒЗИ дәрігерлері, қала тұрғындары, профессор С.Н. Нұғмановтың туыстары мен достары қатысты.