2022 жылғы 5-6 қыркүйекте Қазақстан Республикасы Орталық мемлекеттік ғылыми-техникалық құжаттама архивінің қызметкерлері «Алтыналмас» акционерлік қоғамының құжаттамалық қамтамасыз ету қызметінің мамандарына «Электрондық архив және іс жүргізу» тақырыбында семинар өткізді.
Семинарды Қазақстан Республикасы Орталық мемлекеттік ғылыми-техникалық құжаттама архивінің директоры Жұматаева Баян Амантайқызы құттықтау сөзімен ашты.
Семинардың негізгі мақсаты ғылыми-техникалық және басқару құжаттамасының құндылығына сараптама жүргізуде әдістемелік және тәжірибелік көмек көрсету, «Алтыналмас» АҚ қызметкерлерінің құжаттардың сақталуын және есепке алынуын қамтамасыз ету бойынша кәсіби білімдері деңгейін арттыру болды.
Қазақстан Республикасы Ұлттық архив қорын толықтыру және ведомстволық архивтер бөлімінің қызметкерлері семинар қатысушыларына жобалық құжаттаманы ғылыми-техникалық өңдеу, құжаттардың бірыңғай электрондық архивін құру және оны жүзеге асыру мәселелері, істерді қалыптастыру мен ресімдеу, құжаттарды сақтау мен істерді электрондық архивке өткізу, ЭЦҚ (электрондық цифрлық қолтаңба) пайдалану тәртібі және өзге де сұрақтар бойынша ақпарат берді.
Сондай-ақ қатысушылар үшін Қазақстан Республикасы Орталық мемлекеттік ғылыми-техникалық құжаттама архивіне бейнеэкскурсия, «Электрондық архивке мәліметтерді енгізу», «Цифрландыру процесінің ерекшеліктері» тақырыбында бейне шолу және KAZGOR «Жобалық академиясы» ЖШС ғимаратына экскурсия ұйымдастырылды.
Семинар соңында барлық қатысушыларға сертификаттар табыс етілді. Семинар Қазақстан Республикасы Ұлттық архив қоры құжаттарын ведомстволық архивтерде Қазақстан Республикасының архив ісі саласындағы заңнама талаптарына сәйкес дұрыс қалыптастыруға және сақтауға оң әсерін тигізері сөзсіз.