2023 жылғы 12 қазанда Орынбор қаласында Архив ісі саласындағы ынтымақтастық жөніндегі Ресей-Қазақстан комиссиясының 4-ші отырысы жұмысы аяқталды. Оның қорытындысы бойынша хаттамаға қол қойылды. Ресейлік делегация атынан хаттамаға Федералдық архив агенттігі басшысының орынбасары А.В. Юрасов қол қойды, қазақстандық делегациядан ҚР Мәдениет және ақпарат министрлігінің Архив, құжаттама және кітап ісі комитеті төрағасының орынбасары Г.Е. Қарсақбаева қол қойды.
Құжатта тараптар Ресей Федерациясы мен Қазақстан Республикасының архив қызметтері арасындағы екіжақты достық қарым-қатынасты бекіткені атап өтілген. Архив қызметкерлері екі елдің 2022-2023 жылдар бойынша архив ісін дамыту туралы ақпарат алмасты, сондай-ақ Қазақстан мен Ресей архив мекемелері арасындағы аймақаралық ынтымақтастықты дамытуға ұмтылысын қолдады.
Тараптар Қазақстан мен Ресей архивтерінің 2022-2025 жылдарға арналған бірлескен іс-шаралар жоспарының іске асырылуын талқылады, атап айтқанда, «Қазақстан мен Ресейдегі аштық. 1927-1934 жылдар» және «Қазақстан Ұлы Отан соғысы жылдарында» жинақтары бойынша жұмыстардың аяқталу мерзімдерін, сонымен қатар «Тың жер: Ресей мен Қазақстандағы тың және тыңайған жерлерді игеру. 1920 жылдардың соңы – 1960 жылдар» мен «Бүкілресейлік Орталық атқару комитеті Балалар комиссиясының материалдары негізінде Ресей облыстарындағы көшпелі қазақ балаларының тағдыры» жинақтарын дайындау кезеңдерінің мерзімдерін анықтады.
Сондай-ақ 2024 жылдың бірінші жартыжылдығына жоспарланған комиссияның келесі отырысына дейін Д.А. Қонаевтың өмірі мен қызметі және Кеңестік Қазақстанның кинематографиясы мен театр өнері туралы құжаттар жинақтарын басып шығару мүмкіндігін қарастыру туралы келісімге қол жеткізілді.