Көктем мен жаңарудыдың бастауы саналатын Наурыз мерекесі қарсаңында 2024 жылдың 20 наурызы күні Орталық мемлекеттік ғылыми-техникалық құжаттама архивінің қызметкерлері Қазақстан Республикасы Орталық мемлекеттік архиві мен Орталық мемлекеттік кино-фотоқұжаттар мен дыбыс жазбалар архиві командаларымен қазақ халқының ұлттық ойындарының бірі «Асық ату» ойынын өткізді.
Ертеден келе жатқан бұл ұлттық ойынның тәрбиелік маңызы зор. Ол баланы ептілікке, мергендікке, шапшаңдыққа, сергектікке баулиды. Асық ойнап өскен бала өзгелерден зеректеу, табандырақ, шыдамды болып келеді. «Асығың алшысынан түссін» деп мақалдап сөйлеуінде асық ойынының қазақ мәдениетіндегі өзіндік орнын байқатады. Асықтың: алшы, тәйке, бүк, шік, омпа, шоңқа деген түрлері болады. Оның ішінде алшыны өте жоғары бағалаған. Өмірде жолы болған дәулетті адамдарды «Асығы алшысынан түсіп тұр» деп айтқан. Осы ойын арқылы бабаларымыз жас ұрпақты жастайынан шыңдауға, оларды дәлдікке, ұстамдылыққа, байсалдыққа, төзімділікке, шыдамдылыққа тәрбиелеген.
Сонымен қатар «Арқан тарту» ұлттық ойыны да өтті. Алаң ортасына көлденең сызық сызылып, екі архивтің командалары екі ұшы тұзақтап байланған ұзын арқанды алып екі жақтан белге салып өз жағына қарай тарта бастады. Ортадағы көлденең сызықтан ОМҒТҚА тобы бұрын сүйреп өткізіп, жеңіске жетті.